Den 05.05.2026 huet d’Klass 3GPS eng spannend Rees an d’Welt vun der Fuerschung gemaach: si waren am Scienteens Lab vun der Université du Luxembourg um Campus Belval.
Am Atelier „DNA on the tanning bed“ konnten d’Schüler:Inne selwer an d’Roll vu Wëssenschaftler schlüpfen an modern molekularbiologesch Methoden ausproberen.
Am Labo hunn si DNA aus Bakterien isoléiert, déi ënnerschiddlech behandelt goufen: e puer goufen ouni Schutz staarker UV-Stralung ausgesat, anerer waren duerch Sonnecrème geschützt. Fir erauszefannen, wéi staark d’DNA beschiedegt gouf, hu si e bestëmmte Gen mat PCR vervielfältegt an d’Resultater mat Hëllef vun enger Gel-Elektrophores analyséiert.
D’Resultater ware kloer a beandrockend: UV-Stralen féieren zu Verännerungen an der DNA, wärend Sonnecrème effektiv schützt. Duerch dëst praktescht Experiment hunn d’Schüler:Inne net nëmmen nei Labo-Techniken geléiert, mee och mat eegene Aen gesinn, wéi wichteg et ass, sech géint UV-Stralung ze schützen.
